ପେଟ୍ରୋଲ ପମ୍ପ ଡକାୟତି ଯୋଜନା ପଣ୍ଡ , ୫ ଗିରଫ

ତାଳଚେର(ଏନଟିପି):

ଅନୁଗୋଳ ଜିଲ୍ଲା ତାଳଚେରର ଏକ ପେଟ୍ରୋଲ ପମ୍ପ ଲୁଟ ପାଇଁ ଯୋଜନା କରୁଥିବା ବେଳେ ଏକ ଡକାୟତି ଗ୍ୟାଙ୍ଗର ୫ ଜଣଙ୍କୁ କୋଲିୟରି ପୋଲିସ କାବୁ କରିଛି । ଖବର ନେବାରେ ଜଣାପଡିଛି ୧୧ ତାରିଖ ରାତିରେ ତାଳଚେର କୋଲିୟରି ଥାନା ଏସ.ଆଇ.ଗୋବିନ୍ଦ ଚନ୍ଦ୍ର ସାହୁ ସଦଳବଳେ ପେଟ୍ରୋଲିଂ କରୁଥିବା ବେଳେ ଗୋଟିଏ ଡକାୟତ ଦଳ ଡେରା-ଲିଙ୍ଗରାଜ ରାସ୍ତାର ନିର୍ମାଣାଧୀନ ଡିଏଭି ସ୍କୁଲଠାରେ କିଛି ଯୋଜନା କରୁଥିବା ଖବର ପାଇଥିଲେ । ଖବର ପାଇବା ପରେ ପୋଲିସ ସେଠାରେ ଚଢାଉ କରିବା ସମୟରେ ଅନ୍ଧାର ସୁଯୋଗ ନେଇ ଜଣେ ସେଠାରୁ ଦୌଡି ପଳାଇବାକୁ ସକ୍ଷମ ହୋଇଥିବା ବେଳେ ଏକ ବୋଲେରୋ ଗାଡିରେ ବସିଥିବା ୫ ଜଣଙ୍କୁ ପୋଲିସ କାବୁ କରି ନେଇଥିଲା । ସେମାନଙ୍କୁ ପଚରାଉଚୁରା ବେଳେ ସେମାନେ ଡେରାଠାରେ ଥିବା ସୁଭଦ୍ରା ପେଟ୍ରୋଲ ପମ୍ପରେ ଡକାୟତି କରିବାକୁ ଯୋଜନା କରୁଥିବା ମାନି ଯାଇଥିଲେ । ପୋଲିସ ଯାଞ୍ଚ କରି ସେମାନଙ୍କ ନିକଟରୁ ୬ ଟି କଳା ମୁଖା ,ଗୋଟିଏ ଦେଶୀ ବନ୍ଧୁକ , ୩ ଟି ମୋବାଇଲ ,ଗୋଟିଏ ବୋଲେରୋ ଗାଡି , ଲୁହା ରଡ ,ଲଙ୍କା ଗୁଣ୍ଡା ଆଦି ଜବତ କରିଥିଲା । କୋଲିୟାରି ପୋଲିସ ଡକାୟତି ଯୋଜନା କରୁଥିବା ଅଭିଯୋଗରେ ୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ମାନେ ହେଲେ ସମଲ ଥାନା ଚନ୍ଦ୍ରବିଲ ଗାଁର ଦୀପକ ପ୍ରଧାନ , କୋଲିୟରି ଥାନା କଳମଛୁଇଁ ଗାଁର ଆଶୁତୋଷ ବାରିକ ,ଯଦୁନାଥପୁରର ଜମ୍ବେଶ୍ଵର ନାଏକ ,ତରଣିସେନ ନାଏକ ଓ ତାଳଚେର ଥାନା ମହାରଣାସାହିର ଭଗବାନ ସାହୁ । ଭଗବାନ ଓରଫ ଭଗ ଏମାନଙ୍କ ଗ୍ୟାଙ୍ଗ ଲିଡର ହୋଇଥିବା ବେଳେ କଣିହାଁ ଥାନା ଡେରେଙ୍ଗ ଗାଁ ର ରାଜୁ ନାଏକ ଘଟଣା ସ୍ଥଳରୁ ଫେରାର ହୋଇ ଯାଇଥିବା ଜଣା ପଡିଛି ।ପୋଲିସ ଖୁବଶୀଘ୍ର ଫେରାର ଅଭିଯୁକ୍ତକୁ ଧରିବ ବୋଲି କହିଛି

Share on Facebook

Tweet

Follow us

Save