କାଳିଆ ଯୋଜନାରେ ବିଜେଡି ନେତା ହିତାଧିକାରୀ :ବିଜେପିର ଅଭିଯୋଗ

ଢେଙ୍କାନାଳ (ଏନଟିପି)

ରାଜ୍ୟ ସରକାର ଚାଷୀଙ୍କ ପାଇଁ କରିଛନ୍ତି କାଳିଆ ଯୋଜନା।କାଳିଆ ଯୋଜନା ପ୍ରକୃତ ହିତାଧିକାରୀ ଏହାର ଲାଭ ପାଇବା ବଦଳରେ ବିଜେଡି ନେତା ସାମିଲ ଥିବା ଅଭିଯୋଗ ଉଠାଇଛି ଭାଜପା।ରାଜ୍ୟ ସରକାରଙ୍କ ଦ୍ୱାରା କାର୍ଯ୍ୟକାରୀ ହୋଇଥିବା କୃଷିଭିତ୍ତିକ ଯୋଜନା ‘କାଳିଆ’ରେ ବିଜେଡି ନେତା ହିତାଧିକାରୀ ବୋଲି ଅଭିଯୋଗ ଆଣିଛି ଢେଙ୍କାନାଳ ଜିଲା ଭାଜପା କୃଷକ ମୋର୍ଚ୍ଚା। ଦକ୍ଷିଣକାଳୀ ରୋଡ୍‌ସ୍ଥିତ ଦଳୀୟ ଭାଜପା କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଢେଙ୍କାନାଳ ଲୋକସଭା ପ୍ରଭାରୀ ଦେବାଶିଷ ହୋତା ଏପରି ଅଭିଯୋଗ ଆଣିବା ସହ ଶାସକ ବିଜେଡି ଉପରେ ପ୍ରବଳ ବର୍ଷିଥିଲେ। ଦେବାଶିଷ କହିଛନ୍ତି, ‘କାଳିଆ’ ଯୋଜନାରେ ଅଧିକାଂଶ ସ୍ଥାନରେ ଶାସକ ଦଳର ଜନପ୍ରତିନିଧି ନିଜକୁ ତାଲିକାଭୁକ୍ତ କରାଇଛନ୍ତି। ବିଜେଡି ନିର୍ବାଚନୀ ଚାନ୍ଦା ଆଦାୟ କରିବାକୁ ଏହି ଯୋଜନା କାର୍ଯ୍ୟକାରୀ କରିଛି। ଏହାଦ୍ୱାରା ପ୍ରକୃତ ହିତାଧିକାରୀ ଲାଭବାନ ହେବେନାହିଁ। ଜିଲାର ଜଣେ ମନ୍ତ୍ରୀଙ୍କ ସମ୍ପର୍କୀୟ, ପୂର୍ବତନ ଜିଲା ପରିଷଦ ଉପାଧ୍ୟକ୍ଷଙ୍କ ସମେତ ଅନେକ ସରପଞ୍ଚ କାଳିଆ ଯୋଜନାରେ ହିତାଧିକାରୀ ଅଛନ୍ତି। ହେଲ୍‌ପ୍‌ ଲାଇନ ନମ୍ବରରେ ଯୋଗାଯୋଗ କରାଯିବା ସତ୍ତ୍ୱେ କୌଣସି ପଦକ୍ଷେପ ନିଆଯାଉନାହିଁ। ଆସନ୍ତା ନିର୍ବାଚନରେ ଚାଷୀମାନେ ଏହାର ଜବାବ ଦେବେ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। ଅନ୍ୟମାନଙ୍କ ମଧ୍ୟରେ ଜିଲା କୃଷକ ମୋର୍ଚ୍ଚାର ଦୁର୍ଗା ପ୍ରସାଦ ସାହୁ, ରମେଶ ଚନ୍ଦ୍ର ସାମଲ, ଜିଲା କୃଷକ ମୋର୍ଚ୍ଚା ସଭାପତି ଦୟାନିଧି ସାହୁ ପ୍ରମୁଖ ଉପସ୍ଥିତ ଥିଲେ।

Share on Facebook

Tweet

Follow us

Save