୫୦ ପ୍ରତିଶତ କମ୍ ଯାତ୍ରୀରେ ପରିବହନ ପାଇଁ ଅକ୍ଷମତା ପ୍ରକାଶ କଲେ ବାଲିଗୁଡା ବସ ମାଲିକ ସଂଘ

କନ୍ଧମାଳ(ଏନଟିପି):

ରାଜ୍ୟ ସରକାର ଗ୍ରୀନ ଜୋନ୍ ରେ ଥିବା ଜିଲ୍ଲାଗୁଡ଼ିକରେ ଥିବା ଘରୋଇ ବସ ସେବାକୁ ଅନୁମତି ଦେଇଛନ୍ତି । କିନ୍ତୁ ନିର୍ଦ୍ଧାରିତ ସିଟ୍ ର ୫୦ ପ୍ରତିଶତ କମ୍ ଯାତ୍ରୀରେ ପରିବହନ ପାଇଁ ନିର୍ଦ୍ଦେଶ ଦିଆଯାଇଛି । ଏନେଇ ରାଜ୍ୟ  ଘରୋଇ ବସ ମାଲିକ ସଂଘ ଏକ ପ୍ରେସ ବିଜ୍ଞପ୍ତି ଜରିଆରେ ବସ ଚଳାଇବାକୁ ଅକ୍ଷମତା ପ୍ରକାଶ କରିଛନ୍ତି, ଯାହାକୁ କି’ବାଲିଗୁଡାର ମା’ପାଟଖଣ୍ଡା ଘରୋଇ  ବସ ମାଲିକ ସଂଘ ପୂର୍ଣ୍ଣ ସମର୍ଥନ ଜଣାଇଛି । ଗତ ମାର୍ଚ୍ଚ ୨୩ ତାରିଖରୁ ଘରୋଇ ବସ ସେବା ସମ୍ପୂର୍ଣ୍ଣ ବନ୍ଦ ରହିଥିଲା । କିନ୍ତୁ ମାର୍ଚ୍ଚ ୧୫ ତାରିଖରୁ ବସ ଯୋଗେ ଯାତ୍ରୀ ମାନଙ୍କର ଚଳାଚଳ କମ୍ ହୋଇ ଯାଇଥିବାରୁ ବସ ମାଲିକମାନେ ବହୁ ଆର୍ଥିକ କ୍ଷତିର ସମ୍ମୁଖୀନ ହୋଇଛନ୍ତି । ଇତି ମଧ୍ୟରେ ୪୦ରୁ ଉର୍ଦ୍ଧ୍ୱ ଦିନ ହେବ କନ୍ଧମାଳ  ଜିଲ୍ଲାରେ ଶତାଧିକ  ଘରୋଇ ବସ୍ ସେବା ସମ୍ପୂର୍ଣ୍ଣ ଭାବେ ଠପ୍ ହୋଇଯାଇଛି ଓ ବସ ଗୁଡ଼ିକୁ ମାଲିକମାନେ ଅଫ୍ ରୁଟ କରି ଦେଇଛନ୍ତି । ଏହି ବ୍ୟବସାୟ ଉପରେ ନିର୍ଭର କରୁଥିବା ଡ୍ରାଇଭର,କଣ୍ଡକ୍ଟର,ହେଲପରଙ୍କ ସମେତ ଗ୍ୟାରେଜ ଓ ସ୍ପେୟାର ପାର୍ଟସ ଆଦିରେ ନିୟୋଜିତ ପ୍ରାୟତଃ ୨ହଜାରରୁ ଅଧିକ ଲୋକେ ଜୀବନ ଜୀବିକା ହରାଇ ଭୋକ ଉପାସରେ କାଳ କାଟୁଛନ୍ତି । ପରିବହନ ବ୍ୟବସ୍ଥାରେ ନିୟୋଜିତ ସମସ୍ତ ବସ୍ ର କର୍ମଚାରୀମାନେ ଦିନ ମଜୁରିଆ ହିସାବରେ ନିଯୁକ୍ତି ପାଇଥାନ୍ତି ।ତେଣୁ ଏପରି ଅବସ୍ଥାରେ ସେମାନଙ୍କର ଅବସ୍ଥା ଶୋଚନୀୟ ହୋଇପଡ଼ିଛି । ବସ ମାଲିକମାନେ ଋଣ ପରିଶୋଧ ଚିନ୍ତାରେ ପଡ଼ିଥିବା ବେଳେ ନିଜର କର୍ମଚାରୀମାନଙ୍କୁ ଆର୍ଥିକ ସାହାଯ୍ୟ ଯୋଗାଇ ଦେବାପାଇଁ ଅସମର୍ଥ ହେବା ସ୍ୱାଭାବିକ । ବର୍ତମାନ ସରକାରଙ୍କ ଦ୍ୱାରା ଲକ୍ ଡାଉନ ଅବଧିକୁ ମଇ ୧୭ତାରିଖ ପର୍ଯ୍ୟନ୍ତ ବଢ଼ାଯାଇଛି । ଏଭଳି ସ୍ଥଳେ ବସ ମାଲିକ ତଥା ଏହାସହିତ ସମ୍ପୃକ୍ତ ଅନ୍ୟମାନଙ୍କ ଅବସ୍ଥା ଜଟିଳରୁ ଜଟିଳ ହେବାକୁ ଯାଉଛି । ଏଣୁ ବାଲିଗୁଡା ବସ ମାଲିକ ସଂଘର ସଭାପତି ରବି ଚନ୍ଦ୍ର ପାଳ ଓ ସମ୍ପାଦକ ରବିଚନ୍ଦ୍ର ପାତ୍ରଙ୍କ ସମେତ ଅଞ୍ଚଳର ସମସ୍ତ ବସ ମାଲିକ ଉପରୋକ୍ତ ଅବସ୍ଥା ତଥା ସମସ୍ୟାକୁ ଅନୁଧ୍ୟାନ କରି ଯଥାଶୀଘ୍ର ବିହିତ ପଦକ୍ଷେପ ଗ୍ରହଣ କରିବାକୁ ସରକାରଙ୍କ ନିକଟରେ ନିବେଦନ କରିଛନ୍ତି ।

Share on Facebook

Tweet

Follow us

Save