ଏମ୍‌.ସି.ଏଲ.ର ନୂତନ ନିର୍ଦ୍ଦେଶକ ବୈଷୟିକ ଭାବେ ବବନ ସିଂ ଙ୍କର କାର୍ଯ୍ୟଭାର ଗ୍ରହଣ

ସମ୍ବଲପୁର,(ଏନ ଟି ପି): ମହାନଦୀ କୋଲଫିଲଡ଼ସ ଲିମିଟେଡ଼ର ୪ର୍ଥ ନିର୍ଦ୍ଦେଶକ ବୈଷୟିକ (ଯୋଜନା ଏବଂ ପରିଯୋଜନା) ଭାବେ ବବନ ସିଂ ଗତ ୩୦ତାରିଖରେ କାର୍ଯ୍ୟଭାର ଗ୍ରହଣ କରିଛନ୍ତି । ଶ୍ରୀଯୁକ୍ତ ସିଂ ଇଣ୍ଡିଆନ ସ୍କୁଲ ଅଫ୍ ମାଇନ୍ସ (ଆଇଏସଏମ), ଧାନବାଦରୁ ୧୯୮୫ ମସିହାରେ ମାଇନିଂ ଗ୍ରାଜୁଏଟ ଉପାଧି ହାସଲ କରିଛନ୍ତି । କୋଲ ମାଇନିଂ ସେକ୍ଟରରେ ଶ୍ରୀଯୁକ୍ତ ସିଂ ଙ୍କର ଦୀର୍ଘ ୩୫ ବର୍ଷର ଅଭିଜ୍ଞତା ରହିଥିବା ସହ ସେ କୋଲ ଇଣ୍ଡିଆର ଆନୁସଙ୍ଗୀ କମ୍ପାନୀ ସେଂଟ୍ରାଲ କୋଲଫିଲଡ଼ସ ଲିମିଟେଡ଼, ଝାଡ଼ଖଣ୍ଡ (ସିସିଏଲ) ଓ ସାଉଥ ଇଷ୍ଟର୍ଣ୍ଣ କୋଲ ଫିଲଡ଼ସ ଲିମିଟେଡ଼(ଏସଇସିଏଲ)ର ବିିଭିନ୍ନ ଭୂତଳ ଓ ଖୋଲା ମୁହାଁ କୋଇଲାଖଣିରେ ବିଭିନ୍ନ ପଦପଦବୀରେ ରହି ସପଳତାର ସହିତ ନିଜର ଦାୟିତ୍ୱ ତୁଲାଇଛନ୍ତି । ଭାରତ ସରକାରଙ୍କ ମନ୍ତ୍ରୀମଣ୍ଡଳ (ଏସିସି)ର ନିଯୁକ୍ତି ସମିତି ଦ୍ୱାରା ଅନୁମୋଦନ ମିଳିବାପରେ ଶ୍ରୀଯୁକ୍ତ ସିଂ ଏମ୍‌.ସି.ଏଲ.ର ନିର୍ଦ୍ଦେଶକ ବୈଷୟିକ ଭାବେ ଯୋଗ ଦେଇଥିଲେ। ଏହାପୂର୍ବରୁ ସେ ଏସଇସିଏଲର ଚିରିମିରି ଏରିଆର ମହାପ୍ରବନ୍ଧକ ଭାବେ କାର୍ଯ୍ୟ କରୁଥିଲେ । ମାନବ ସଂସାଧନରେ ଏମବିଏ ଉପାଧି ହାସଲ କରିଥିବା ଶ୍ରୀଯୁକ୍ତ ସିଂ ବିଭିନ୍ନ ୟୁରୋପୀୟ ଦେଶ ଯଥା ଇଟାଲୀ, ଫ୍ରାନ୍ସ, ଭେନିସ, ଆମଷ୍ଟରଡାମ, ଫ୍ଲୋରେନ୍ସ, ରୋମ ଆଦି ଗସ୍ତ କରି ଖନନ କ୍ଷେତ୍ରରେ ଅଭିଜ୍ଞତା ହାସଲ କରିଛନ୍ତି । ସେ ଚୀନରେ ଅନୁଷ୍ଠିତ ହୋଇଥିବା ଇଣ୍ଡିଆନ ମାଇନିଂ କଂଗ୍ରେସରେ ପ୍ରତିନିଧିତ୍ୱ  କରିଥିଲେ । ନୂତନ ଦାୟିତ୍ୱ ଗ୍ରହଣ ପରେ ଏମ୍‌.ସି.ଏଲ ପରିବାର ପକ୍ଷରୁ ଶ୍ରୀଯୁକ୍ତ ସିଂ ଙ୍କର ସଫଳତା କାମନା କରାଯାଇଛି । 

Share on Facebook

Tweet

Follow us

Save