ଶାହୀନବାଗରେ ୧୪୪ ଧାରା ଲାଗୁ

ନୂଆଦିଲ୍ଲୀ(ଏନଟିପି):

ଦେଶର ରାଜଧାନୀ ଦିଲ୍ଲୀର ଶାହୀନବାଗରେ ନାଗରିକତ୍ୱ ସଂଶୋଧନ ଆଇନ (ସିଏଏ)କୁ ବିରୋଧ କରି ଆନ୍ଦୋଳନ ଚାଲିଛି।  ଏହି ଆନ୍ଦୋଳନକୁ ଆଜି ହିନ୍ଦୁ ସେନା ବିରୋଧ କରିଛି । ସ୍ଥିତିକୁ ସୁଧାରିବା ପାଇଁ ଦିଲ୍ଲୀ ପୋଲିସ ଶାହୀନବାଗରେ ୧୪୪ ଧାରା ଜାରି କରିଛି । 

ଦିଲ୍ଲୀରେ ସ୍ଥିତି ଅଣାୟତ ହେବା ଆଶଙ୍କା କରି ସଂପୃକ୍ତ ଅଞ୍ଚଳରେ ଧାରା ପୋଲିସ ୧୪୪ ଲାଗୁ କରିଛି। ହିନ୍ଦୁ ସେନାର ବିଷ୍ଣୁ ଗୁପ୍ତା ଟୁଇଟ୍ କରି କହିଛନ୍ତି, ‘ଶାହୀନବାଗରେ ସିଏଏ ବିରୋଧୀ ପ୍ରଦର୍ଶନକାରୀଙ୍କୁ ହଟାଇବାରେ ଦିଲ୍ଲୀ ପୋଲିସ ବିଫଳ ହୋଇଛି । ଭାରତର ସମ୍ବିଧାନର ଧାରା ୧୪, ୧୯, ୨୧ ଅନୁଯାୟୀ ଆନ୍ଦୋଳନ ପାଇଁ ସାଧାରଣ ଲୋକଙ୍କ ମୌଳିକ ଅଧିକାର ଉଲ୍ଲଂଘନ ହେଉଛି । ତେଣୁ ୧ ମାର୍ଚ୍ଚ ୨୦୨୦ ସକାଳ ୧୦ଟାରେ ଧାରଣାସ୍ଥଳକୁ ଆସିବାକୁ ସିଏଏ ସମର୍ଥକକୁ ନିମନ୍ତ୍ରଣ କରାଯାଉଛି’। ତେବେ ପୋଲିସ କାହାକୁ ମଧ୍ୟ ଏକାଠି ନ କରିବାକୁ ୧୪୪ ଧାରା ଜାରି କରିଛି । ଯଦି କେହି ୧୪୪ ଧାରାକୁ ଉଲ୍ଲଂଘନ କରିବ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଦକ୍ଷିଣ ପୂର୍ବ ଜିଲ୍ଲା ପୋଲିସ ପକ୍ଷରୁ କୁହାଯାଇଛି । ତେବେ ପୋଲିସ ୧୪୪ ଧାରା ଲାଗୁ କରି ହିନ୍ଦୁ ସେନାର ଆହ୍ୱାନକୁ ବିଫଳ କରିଛି। 

ଆଜି ସକାଳେ ମଦନପୁର ଖାଦର ଓ ସରିତା ବିହାର ଲୋକମାନେ ଉତ୍ତର ପୂର୍ବ ଦିଲ୍ଲୀରେ ହୋଇଥିବା ହିଂସା ବିରୁଦ୍ଧରେ ଶାନ୍ତି ମାର୍ଚ୍ଚ କରିଥିଲେ । ତେବେ ଏହାକୁ ଦେଖି ଦିଲ୍ଲୀ ପୋଲିସ ସରିତା ବିହାର ଓ ଶାହୀନବାଗକୁ ଯୋଗାଯୋଗ କରୁଥିବା ଆଖପାଖ ରାସ୍ତାରେ ବ୍ୟାରିକେଡ ସାଙ୍ଗକୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଛି। ସୁରକ୍ଷା ଦୃଷ୍ଟିରୁ ବ୍ୟାପକ ପୋଲିସ ମୁତୟନ କରାଯାଇଛି । ହିଂସା ପ୍ରଭାବିତ ଅଂଚଳରେ ଧାର୍ମିକ ଗୁରୁ ରବିଶଙ୍କର ପହଂଚି ସ୍ଥିତି ପରଖିବା ସହ ଶାନ୍ତି ପାଇଁ ଅପିଲ କରିଛନ୍ତି ।

Share on Facebook

Tweet

Follow us

Save