ନୂଆଦିଲ୍ଲୀ(ଏନଟିପି):
ଅନୁଗୋଳ ଜିଲ୍ଲା ତାଳଚେର ଦେଇ ଯାଇଥିବା ବ୍ରାହ୍ମଣୀ ନଦୀରେ ଦ୍ୱିତୀୟ ସେତୁ ନିର୍ମାଣ ପାଇଁ ଢ଼େଙ୍କାନାଳ ସାଂସଦ ମହେଶ ସାହୁ ଗତ ୧୯ ତାରିଖରେ ସଂସଦରେ ଦାବି କରିଥିଲେ । ସାଂସଦ ଶ୍ରୀ ସାହୁ ,ନଦୀ ଉପରେ ରାଜବାଟୀ ନିକଟରେ ସେତୁ ଦାବୀର ଯଥାର୍ଥତା ଓ ତାଳଚେର ନିମନ୍ତେ ଏହାର ଆବଶ୍ୟକତା ଜଣାଇବା ସହ ଏଥିପାଇଁ ଅର୍ଥ ମଞ୍ଜୁର କରାଯିବା ପାଇଁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସିତାରମଣଙ୍କୁ ଭେଟି ଏକ ସ୍ମାରକପତ୍ର ପ୍ରଦାନ କରିଛନ୍ତି । ଶ୍ରୀ ସାହୁ ତାଳଚେରରେ ଦେଖା ଦେଇଥିବା ବାୟୁ ପ୍ରଦୁଷଣ ଏବଂ ଜାତୀୟ ରାଜପଥରେ ଟ୍ରାଫିକ୍ ସମସ୍ୟା ଯୋଗୁଁ ଏ ଅଞ୍ଚଳରେ ଦେଖାଦେଇଥିବା ଅସୁବିଧାକୁ ସମାଧାନ ଦିଗରେ ଏହି ସେତୁ ବେଶ ସହାୟକ ହେବ ବୋଲି ପ୍ରକାଶ କରିଛନ୍ତି । ତାଳଚେରରେ ଥିବା ଏମ.ସି.ଏଲ,ନାଲକୋ,ଏନ.ଟି.ପି.ସି ଆଦି ରାଷ୍ଟ୍ରାୟତଉଦ୍ୟୋଗ ଗୁଡିକ ଯୋଗୁଁ ରାସ୍ତାରେ ଅନେକ ଯାନବାହାନ ଯାତାୟତ କରିବା ଯୋଗୁଁ ଜାତୀୟ ରାଜପଥ ମରଣଯନ୍ତା ପାଲଟିଛି । ସେଥିପାଇଁ ଅନେକ ସମୟରେ ଅଞ୍ଚଳବାସୀଙ୍କ ପକ୍ଷରୁ ରାସ୍ତାରୋକ, ଖଣି ବନ୍ଦ ଆନ୍ଦୋଳନ ହୋଇ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କର ବ୍ୟାପକ ରାଜସ୍ୱ ହାନି ଘଟୁଛି । ତେଣୁ ଏହି ରାଷ୍ଟ୍ରାୟତ ଉଦ୍ୟୋଗଗୁଡିକର ଆର୍ଥିକ ସହାୟତାରେ କୋଇଲାଖଣିଠାରୁ ଏକ ସ୍ୱତନ୍ତ୍ର ରାସ୍ତା ବାହାରି ତାଳବେଡା ରେଲୱେ କ୍ରସିଂ ଜାତୀୟ ରାଜପଥ ଦେଇ ପୁରୁଣା ଯୁବରାଜ ହାଇସ୍କୁଲ , ମାଙ୍କଡକେନ୍ଦା ପୋଲ ପର୍ଯ୍ୟନ୍ତ ରାସ୍ତାକୁ ଓସାରିଆ ଓ ସମ୍ପ୍ରସାରଣ କରି ବ୍ରାହ୍ମଣୀ ନଦୀ ଉପରେ ପୋଲ ନିର୍ମାଣ କରାଯିବା ସହ ଏହି ପୋଲ ନଦୀ ଆରପାଖ ଖାଲପାଳ ଦେଇ ପିତିରି ଛକ ୧୪୯ ନଂ ଜାତୀୟ ରାଜପଥରେ ସଂଯୋଗ କରାଯାଇପାରିବ । ଏହା ହେଲେ ସମଗ୍ର ଅଞ୍ଚଳ ପାଇଁ ଦେଖା ଦେଇଥିବା ଟ୍ରାଫିକ୍ ସମସ୍ୟା ଓ କଳକାରଖାନା ପାଇଁ ଉପୁଜୁଥିବା ଅସୁବିଧା ଦୂର ହେବା ସହ ଗମନାଗମନ ଦୃଷ୍ଟିରୁ ସହାୟକ ହେବ ବୋଲି କେନ୍ଦ୍ର ଅର୍ଥମନ୍ତ୍ରୀ ଶ୍ରୀମତୀ ସୀତାରମଣଙ୍କୁ ସାଂସଦ ଶ୍ରୀ ସାହୁ ଅବଗତ କରାଇଛନ୍ତି । କେନ୍ଦ୍ରମନ୍ତ୍ରୀ ଏହି ଦାବିକୁ ଗ୍ରହଣ କରିବା ସହ ଏଥିପାଇଁ ସ୍ୱତନ୍ତ୍ର ଧ୍ୟାନ ଦେବାପାଇଁ ସମ୍ମତି ପ୍ରକାଶ କରିଥିବା ଜଣାପଡିଛି ।ଦେଖା ଯାଉ ସତରେ ବ୍ରାହ୍ମଣୀ ସେତୁ ଉପରେ ପୋଲ ମଞ୍ଜୁରୀ ଉପରେ କେନ୍ଦ୍ର ଅର୍ଥମନ୍ତ୍ରୀ କେବେ ନେଉଛନ୍ତି ନିଷ୍ପତି।
