ବରଗଡ଼(ଏନଟିପି):
ବିଜେପୁରର ଦାୟିତ୍ୱ ନେବା କହି ଅଂଚଳବାସୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରତାରଣା କରିଛନ୍ତି ବୋଲି ଶୁକ୍ରବାର ବିଜେପୁର ଉପନିର୍ବାଚନ ପରିପ୍ରେକ୍ଷୀରେ ଗାଇସିଲଟ୍ ବ୍ଲକ ତାଲପାଲିରେ ବିଜେପି ପକ୍ଷରୁ ଆୟୋଜିତ ଜନସଭାରେ ଯୋଗଦେଇ କହିଛନ୍ତି ଧର୍ମେନ୍ଦ୍ର ପ୍ରଧାନ ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ବିଜେପୁରରେ କଣ ପାଇଁ ଉପନିର୍ବାଚନ ହେଉଛି? ଏହା ମୂଳ ପ୍ରସଙ୍ଗ । ଗତ ସାଧାରଣ ନିର୍ବାଚନରେ ବିଜେପୁରବାସୀ ମୁଖ୍ୟମନ୍ତ୍ରୀଙ୍କୁ ଭରସା କରି ଭୋଟ ଦେଇଥିଲେ । ‘ମୁଁ ବିଜେପୁରର ବିକାଶ କରିବି’ ବୋଲି ମୁଖ୍ୟମନ୍ତ୍ରୀ ନିର୍ବାଚନ ପ୍ରଚାରରେ କହିଥିଲେ କିନ୍ତୁ ବିଜେପୁରରେ ବିଜୟ ହାସଲ କରିବା ପରେ ମଧ୍ୟ ଏଠାରେ ବିକାଶ କୂଆଡେ ଗଲା? ଲମ୍ବା ସମୟ ଧରି ଶାସନରେ ଥିବା ମୁଖ୍ୟମନ୍ତ୍ରୀ କାହିଁକି ହିଞ୍ଜିଳି ଆସନରୁ ନଓହରି ବିଜେପୁର ଆସନରୁ ଓହରିଗଲେ? କାହଁକି ବିଜେପୁରବାସୀଙ୍କ ଭରସାକୁ ମୁଖ୍ୟମନ୍ତ୍ରୀ ପ୍ରତାରଣା କଲେ? ମୁଖ୍ୟମନ୍ତ୍ରୀଙ୍କୁ ଭରସା କରିବା ବିଜେପୁରବାସୀଙ୍କ ଭୁଲ ଥିଲା କି ବୋଲି ପ୍ରଶ୍ନ କରିଛନ୍ତି ଧର୍ମେନ୍ଦ୍ର ପ୍ରଧାନ ।
ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ରାଜ୍ୟ ସରକାର ଏବେ ମୋ ସରକାର ଯୋଜନା ଆରମ୍ଭ କରିଛନ୍ତି । ତେବେ ଏହା ପୂର୍ବରୁ ରାଜ୍ୟରେ କାହା ସରକାର ଥିଲା? ଦୁର୍ନୀତିଗ୍ରସ୍ତ ଲୋକଙ୍କର ନା ଚିଟଫଣ୍ଡ ଚୋର ମାନଙ୍କର ନା ଓଡିଆ ଲୋକଙ୍କୁ ଠକୁଥିବା ଲୋକଙ୍କର ସରକାର ଥିଲା ବୋଲି ସେ ପ୍ରଶ୍ନ କରିଛନ୍ତି । ରାଜ୍ୟ ସରକାରଙ୍କ ମୋ ସରକାର ଯୋଜନାରେ ଯାଜପୁର ଜିଲ୍ଲାରେ ଏସପି ଡାକ୍ତରଖାନା ତଦାରଖ କରିବାକୁ ଯାଉଛନ୍ତି । ତେବେ ଡାକ୍ତରଖାନା ତଦାରଖ ପାଇଁ ଜିଲ୍ଲପାଳ କୁଆଡେ ଗଲେ ବୋଲି ସେ କହିିଛନ୍ତି ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ବିଜେପୁରରେ ଏବେ ସୁଦ୍ଧା ମଧ୍ୟ ପ୍ରତି ଘରକୁ ପାଇପରେ ବିଶୁଦ୍ଧ ପାଣି ପହଁଚି ପାରିନାହିଁ, ଜଳସେଚନର ବ୍ୟବସ୍ଥା ହୋଇନାହିଁ, ବିଜେପୁର ଅଂଚଳରେ ଗଙ୍ଗାଧର ଜଳସେଚନ ପ୍ରକଳ୍ପ ହୋଇପାରିଲା ନାହିଁ, ଯୁବକଙ୍କୁ ରୋଜଗାର ମିଳିନାହିଁ । ତା’ ହେଲେ ମୁଖ୍ୟମନ୍ତ୍ରୀ ବିଜେପୁରରେ କେଉଁ ଦାୟିତ୍ୱ ନେଇଥିଲେ ବୋଲି ସେ ପ୍ରଶ୍ନ କରିଛନ୍ତି । ବିନା କାମରେ ବିନା ଦାୟିତ୍ୱରେ ବାରମ୍ବାର ଲୋକମାନଙ୍କୁ ଯେଉଁମାନେ ମିଛ କୁହନ୍ତି ତାଙ୍କୁ ଗଣତନ୍ତ୍ରରେ ଉତର ଦେବାର ଆବଶ୍ୟକତା ଥାଏ ବୋଲି ସେ କହିଛନ୍ତି ।
ସେ କହିଛନ୍ତି ଯେ ନରେନ୍ଦ୍ର ମୋଦିଙ୍କ ସରକାର ଧାନର ଏମଏସପି ମୂଲ୍ୟ ଦେଢ ଗୁଣା ବୃଦ୍ଧି କରିବା ପରେ ମଧ୍ୟ ଏଠାରେ ଧାନର ମୂଲ୍ୟ କ୍ୱିଂଟାଲ୍ ପିଛା ୧୨୦୦ ଟଙ୍କାରେ ବିକ୍ରି ହେଉଛି । ଚାଷୀଙ୍କ ପରିବର୍ତେ ମୁଖ୍ୟମନ୍ତ୍ରୀ ଓ ନେତାଙ୍କ ପାଖ ଲୋକ ଏଠାରେ କାଳିଆ ଟଙ୍କା ପାଇଥିବା ଜଣାପଡିଛି ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି ।
ସମସ୍ତଙ୍କ ମୁଣ୍ଡ ଉପରେ ଘର, ପ୍ରତି ଘରକୁ ନଳ ଯୋଗେ ପିଇବା ପାଣି, ଘରକୁ ବିଜୁଳି ଓ ଉଜ୍ଜଳା ଗ୍ୟାସ ଦେବାର ଦାୟତ୍ୱ ନେବା ବ୍ୟକ୍ତିତ୍ୱର ନାଁ ନେଲା ନରେନ୍ଦ୍ର ମୋଦି । ଯେ କାମ କରୁଛି ତାକୁ ଭରସା କରିବା ଦରକାର, ଯେ ପ୍ରତାରଣା କରୁଛି ତାକୁ ନୁହେଁ ବୋଲି ଧର୍ମେନ୍ଦ୍ର ପ୍ରଧାନ ଜନସାଧାରଣଙ୍କୁ ସମ୍ବୋଧନ କରି କହିଛନ୍ତି । ତେଣୁ ଦେଶରେ ନରେନ୍ଦ୍ର ମୋଦିଙ୍କ ହାତମୁଠାକୁ ଟାଣ କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି ।
ଉଲ୍ଲେଖନୀୟ ଯେ, ଏହି ଅବସରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିଜେପୁରର ବିଭିନ୍ନ ଅଂଚଳରେ ଦଳୀୟ ଶୋଭାଯାତ୍ରାରେ ପ୍ରାର୍ଥୀ ସନତ ଗଡତିଆ ଓ ବରିଷ୍ଠ ନେତାଙ୍କ ସହ ଯୋଗଦେଇ ଦଳୀୟ ପ୍ରାର୍ଥୀ ସନତ ଗଡତିଆଙ୍କୁ ପଦ୍ମ ଫୁଲରେ ମୋହରମାରି ଜୟଯୁକ୍ତ କରିବାକୁ ସାଧାରଣ ଜନତାଙ୍କୁ ନିବେଦନ କରିଥିଲେ ।
